http://www.e-venesie.eu/topic148.html
Paolo Pero » Sat Feb 14, 2015 7:28 pm
Partimo da ła version che va de moda deso (dal sito del Coriere de ła Sera):
Il 10 febbraio è il giorno del ricordo di una pagina tra le più cupe della storia contemporanea, avvolta a lungo nel silenzio e nel buio, come le tante vittime, inghiottite nelle cavità carsiche, le cosiddette foibe, per volere del maresciallo Tito e dei suoi partigiani, in nome di una pulizia etnica che doveva annientare la presenza italiana in Istria e Dalmazia. Fra il 1943 e il 1947 oltre 10 mila persone furono gettate vive o morte in queste gole, un genocidio che non teneva conto di età, sesso e religione, riconosciuto ufficialmente nel 2004, con la legge numero 94 che istituì la «Giornata del Ricordo», in memoria dei martiri delle foibe e dell’esodo giuliano dalmata.
Ndemo co ordine... Prima ròba da notar, ła data sielta. Parché el 10 de febraro? El 10 de febraro xe 'l aniversario del Tratato de Parixe (1947), che sarìa cueło ligà a ła firma de ła pase dopo ła seconda guera. Donca na data che in teoria sarìa da ricordar come na festa, invese no, da noaltri xe el dì del ricordo de na tragedia.
Parché cuindi i ga sielto propio el 10 de febraro? Parché co'l tratato de Parixe, Fiume Xara e scuaxi tuta l'Istria i ghe va a ła Jugoslavia... Xe donca ciaro patoco che xe sta sielta cheła data là par motivi ideołoxisi ligai al "irridentismo".
(serti i fa polemica anca parché i ła ga mesa a pochi dì dal xorno de ła memoria, come se i vołese in calche modo metar so'l steso pian łe do ròbe... secondo mi però ła xe na połemica che no ga senso)
Seconda ròba da notar: se parla de vołer de Tito e dei so partexani. Se no me ricordo małe sta version ła se baxa so na dichiarasion che gheva fato un personajo visin a Tito inte i ani dopo ła guera. El gheva dito che Tito ło gheva mandà in Istria parché cognava parar via i itałiani, che i gavarìa podesto crear rogne pa'l novo stato Jugoslavo. Pecà che sto sior cuà in chel periodo no'l jera in Istria...
Tersa ròba: el xenosidio. De xenosidio gheva parlà anca Napolitano inte un so discorso del 2007. Anałixando i nùmari però ła vedo dura parlar de xenosidio... Anca parché infrà i morti ghe xe stai anca racuanti slavi. Come infrà i partexani titini ghe jera racuanti istriani venetofoni...
Cuarto: el periodo, '43 - '47. Vien mesi tuti insieme epixodi difarenti (el parché ło vedaremo pì soto, co parlaremo de l'exodo). E foibe istriane łe xe del '43 (durante ła guera). Cuełe triestine/gorisiane łe xe dal '45 in vanti (ultimo toco de ła guera e dopo guera).
Cuinto: i nùmari. 10 miła i xe tanti (ma serti i parla parfin de 15 miła). Se trata de na stima un fià taroca par dar l'idea del xenosidio... In verità se parla de calche sentenaro de morti so łe foibe istriane (500/700). Par cuełe triestine/gorisiane i nùmari i xe difarenti, ma se se desmentega senpre de cueło che xe suceso in chel periodo in altre xone de l'Eoropa. Par exenpio inte'l dopoguera in Emiłia-Romagna pare che i gapia copà pì de 2 miła persone (el dopio rispeto łe stime serie che vien fate so łe foibe triestine [1]...)
Se pol donca dire che i nùmari veri i xe in linea co cueło che xe suceso altrove.
Sesto: "oltre 10 mila persone furono gettate vive o morte in queste gole". Cuesta ła xe na bała beła grosa. Ła majoransa de łe vitime ła xe morta inte i canpi de consentramento o durante el trasferimento in sti canpi. Ma dire che un nùmaro cusì grando de persone łe xe stae copae in sta maniera serve a otegner un serto efeto ("che cativi i slavi, i xe de łe bestie")
Noda
[1] A propoxito de łe foibe triestine, pararia che a Baxoviça, ła foiba che xe monumento nasional e sinboło de sta traxedia, cuełi che xe drento i sia in gran parte soldai todeschi...
Vegnemo al exodo. Secondo ła version "uficial" a seguito dei eventi descriti sora e al pasajo de l'Istria da Itałia a Jugoslavia trexendosincuantamiła (350.000) istro-itałiani e dalmato-itałiani i ga lasà ła so tera.
1) Dixevo sora che parlar de łe foibe come se le fuse un evento ùgnoło serve a un scopo. Łe foibe istriane łe xe inte'l '43. Ma 'l exodo el xe sucesivo. Donca se se vol sostegner che i xe ndai via parché i gheva paura de èsar "infoibai" cogna tratar łe foibe come un evento ùgnoło ciapando drento anca cuełe triestine/gorisiane...
2) Chel nùmaro là no'l sta ne in cieło e gnanca in tera. Parché el xe scuaxi conpagno del nùmaro dei abitanti in Istria in chel periodo (e intendo tuti, slavi conprexi) e 'l xe pì grando del nùmaro dei itało-istriani... Ma parché ałora se parla de 350 mila? Parché se da do idee in sto modo: i xe ndai via tuti (nisun xe restà là... e no xe vero, ma a chi che ga sparà chel nùmaro no ghe ndava a genio cuełi che gheva sielto de star là), e tuti là i jera "itałiani" (che no xe vero, ła xe senpre sta na minoransa).... Idee che ghe fa comodo ai iridentisti.
3) I motivi del exodo i xe difarenti. Del resto el va vanti fin ai ani '50. Tanti i ga fato anca na sielta de vita ligà a l'economia.
4) I dalmati. Eco, in Dalmasia el nùmaro de "itałiani" xà da inisio '900 (prima che rivase i austriasi i nùmari i jera difarenti) el jera asé baso, se parla del 3% de ła popołasion (in Istria invese se parla de un 30/40%, che resta costante inte'l tenpo). Scuaxi tuti a Xara e in calche ìxoła. E da Xara i va via xà durante ła guera par scanpar da łe bonbe (che secondo i sołiti xe sta Tito a dirghe ai aleati de bonbardarla, cusì el se ga levà de torno i "itałiani"... ma no xe vero), donca tirar drento anca i dalmati co se parla del exodo del dopo guera no xe so mare bona...
5) I altri exodi. Cognarìa ricordar anca i movimenti de popołasion che xe vegnesti prima... Difati soto el goerno itałian un mucio de slavi e de todeschi i scanpa da l'Istria e da Trieste... e al so posto vien mandai un mucio de itałiani.
6) I slavi contai come itałiani... Co se anałixa i nùmari del exodo cognaria far tri muci: i "istro-itałiani" (o mèjo istro-veneti) che abitava là da un bel toco, i itałiani che xe rivai là dopo el 1918, i sloveni e croati che ga sielto de ndar via da ła Jugoslavia. Invese i vien contai tuti insieme, parché cusì i fa nùmaro. Mi però ghe tegno a far sta distinsion, parché me despiaxe pa' i istro-veneti e anca pa' i slavi che xe ndai via da caxa sua, ma pa' i itałiani inportai no me despiaxe gnanca na s•cianta.
Bon, par deso go scrito che basta. So ste ròbe ghe tornarò pì vanti, spiegando mèjo e portando anca de łe fonti. Deso xe ora de parlar de cueło che xe suceso prima, cioè de cueło che vien desmentegà... overo xe ora de parlar del Narodni dom, de Lubiana, de Podhum, de Arbe, de Mario Roatta... in poche paròłe de cueło che ga fato ła "brava xente" e che no se ricorda mai, parché łe bestie łe xe chealtre, cuełe che parla difarente [*].
[*] A propoxito... ghe xe na foto che circoła e ła vien doparà da chi che vol ricordar el 10 de febraro (ani fa i ła ga mostrà anca a Porta a Porta). Se trata de un ploton de execusion che ghe spara a un fià de xente... Pecà che cuełi che spara i xe 'l exercito itałian, e cuełi che more i xe i partexani titini...
sixara Mon Feb 16, 2015 4:18 pm
paolo pero ha scritto:Cuinto: i nùmari. 10 miła i xe tanti (ma serti i parla parfin de 15 miła). Se trata de na stima un fià taroca par dar l'idea del xenosidio... In verità se parla de calche sentenaro de morti so łe foibe istriane (500/700). Par cuełe triestine/gorisiane i nùmari i xe difarenti, ma se se desmentega senpre de cueło che xe suceso in chel periodo in altre xone de l'Eoropa. Par exenpio inte'l dopoguera in Emiłia-Romagna pare che i gapia copà pì de 2 miła persone (el dopio rispeto łe stime serie che vien fate so łe foibe triestine [1]...)
Mi a go sentìo de 5mila, però anca 500/700 nò ke i sia poki, eh? Certo no se pòe parlar de jenocidio ( ke mi credo ke l termine l indica na coalke baxe etnica-relijoxa pal sterminio) però gnanca paragonarlo co le 2mila e pàsa persone de l Emilia-Romagna, ke te kel caxo - mi credo - ca ghe sia stà solo ke motivazhion politike.
no sò, a ghevo sì na mèza idea ke le robe le fùse pì conplicà de come ke i ne la conta ma nò cusì ingarbujà.
E d altra parte, parké mai le dovarìa èsare senplici ste robe cuà: al bianco/nero o mejo roso/nero no go mai credesto.
Ke tuto el 'ben' el sia da na parte e tuto el 'male' da kelaltra.
A vegno da on paexìn ke l è stà tocà da na trajedia simile : de i falsi partijani i se jera inbuxà te na banda de cuei veri, ke i li gà scoerti e torturà e copà. Cuatro i jèra e 40 se dovea coparghene secondo la regola de 1 a 10. A la fine i è stà 43, fuxilà a grupi de 5 sol muro de la caxeta del barbiere. I è ndà torsene on poki tel carcere de Rovigo ma la pì parte i jera zente del posto, mucià su n municipio dopo la mésa.
Calkedùn i lo gà molà ( me nòno infra cuesti) altri i li gà tegnù. Fra i tanti do ragazheti de cuìndaxe-sedexàni, neodi del capo partijano. Ke naturalmente el stava ben sconto da coalke parte.
Brute storie. No ghè onori, no ghè medaje o riconosimento so ste robe cuà. Solo trajedia.
paolo pero Feb 17, 2015
sixara":Mi a go sentìo de 5mila, però anca 500/700 nò ke i sia poki, eh?[/quote]
Xe che tante volte i conta anca cueli che xe morti so i canpi 'ndove che i radunava par colpa del tifo o de calche altro małano. D'ogni modo xe ciaro patoco che 500/700 no i xe pochi. Anca uno sarìa masa (parlo de xente sensa colpe oviamente). Però xe ròbe che in guera capita.
[quote="sixara ha scritto:Certo no se pòe parlar de jenocidio ( ke mi credo ke l termine l indica na coalke baxe etnica-relijoxa pal sterminio) però gnanca paragonarlo co le 2mila e pàsa persone de l Emilia-Romagna, ke te kel caxo - mi credo - ca ghe sia stà solo ke motivazhion politike.
Mi no credo che inte łe vendete che ghe xe stae inte'l dopoguera se tratase soło che de motivasion połitiche. Tanti magari ghi ne ga aprofità par far i so comodi (tipo far fora el visin parché i gheva un radego o calche debito co łù... opure, savemo che tanti i xe deventai partexani pena che i ga visto che i jera drio perdare: vuto che nisun ghi ne gapia aprofità par far fora calche testimone de na so presedente atività?).
E anca là a oriente ghe sarà stà situasion de sta sorte. Del resto ghe xe storisi che parla de jaquerie, parché in tanti caxi i ga fato fora i paroni...
http://it.wikipedia.org/wiki/Jacquerie
A so contento parké sti do toxati łi ghe ła mete tuta par raxonar, s-ciarir e parlar pułito.