Pronomi personali (anca parnomi o pranomi)
viewtopic.php?f=82&t=1732
Ghe vago drìo la gramatica de la Marcato, ca ne pensè-i, ke i pronomi personali n LV i è na roba on fià conplicà da descrivare, on fià manco co i doparemo cusì, come ke i vièn i vièn, sen'za star lì pensar-ghe sora, ca te te ingarbùji e basta.
Elora ( la dixe la Marcato ) :
prima roba da fare : distinguarli fra pronomi tònici e àtoni. Pararìa on sker'zo eh, de dire ke ono el ga da sentir-se-la , la lengoa, ma come ca savemo la lengoa prima la se parla e dopo, ma tanto dopo, la se scrìve. Elora l acento el ga la so inportan'za, el fa la difaren'za, soradetuto se l manca e l tende a pozarse so la forma ca vien subito prima o subito dopo de l pronome àtono.
Clìtici i vien anca diti, e proclitici se i se pòza a la parola ca vien dopo, ma sen'za tacarse graficamente ( come n te vedi), e enclitici se i se taca la parola ca vien prima, anca graficamente ( come n vedito? vardame).
SOJETO PRONOMINALE TONICO E ATONO
A difaren'za de l italian, indove ke a ghe xe on solo pron.sojeto ca se pòe dirghe clitico, el ' si ' inpersonale, n LV a ghemo na certa 'bondan'za dixen, de pronomi sojeto clitici. Ghe somejemo te on certo modo a la lengoa francexe.
El fato xe ke n veneto, a difaren'za de italian, el pron. sojeto el ghe và senpre, l è obligatorio de metarlo ke sinò no la stà n piè la fraxe, come n englexe, come n tedesco de l resto.
Elora se vede ke, pitosto ke star in manco, a ghemo pensà de stare n bòn co i pronomi...
e difati ke l soj.pron. el ghe xe te la forma tònica : mi son, lu ga;
ma anca te cuea àtona : te vedi, el ga, i sa;
altre olte a ghe li metemo tuti do : ti te ghe, ti ti ga, ti tu à, lu el sà, ea eà fa, lori i drom...
A zonta, le forme àtone le se conpagna a l verbo anca sa ghe xe zà el sojeto nominale cofà : Gigi el ga fato, ea Maria ea ga dito, el gato l salta.
A zonta de la zonta , anca le relative co l ' ke ' le ciapa la forma pronominale come n : ghe sarà persone ke le dirà, i operai ke i và laorare bonora, on putìn ke l se ciama Manuel.
Pronomi personali sojeto de forma tònica (n lengoa polexana) :
mi
ti
lu
ela
nantri/e
valtri/e
luri
lore
( a ghevimo anca la forma de cortexia : vu ke dèso no la se dòpara pì, però a ghemo coalke dificoltà doparare la forma de cortexia col lei, cofà n italiàn, elora a tiremo pa le curte : a ghe demo de l ti a tuti e bèa ke finia)
Forma àtona :
a
a te
el
la
a
a
i
le
( de le olte a doparemo anca solo la forma àtona : a penso ke le robe le vaga male ; ciàre olte a doparemo la forma tònica da ela sola : mi credo ke le robe le vaga male)