KRAUTI ... ki ke no ghe piaxe i kràuti nol xe vèneto
Al dì de oncò, i kràuti i se conpra n botega, ma na olta i se li faxea n caxa: la jera la so riserva de verdure pa l inverno, n conpagnia co tute kele altre verdure mése n
conposta. Ma i kràuti xe kràuti: na roba on fià tedesca dixen, alto-vèneta comuncue ke mi a go inparà a conosare e apre'zare gra'zie a mia nòna vixentina ke da inàlto la se jera portà zo on poke de le so tradi'zion.
Elora kràuti :
a ghe vòe i cavoli naturale, e de l to orto se posìbile, e i se taja a strike e se ghe tira via el castelon, podopo i se mete dentro tel
brènto da cràuti, ( ke l sarìa na spece de masteleto ma pì longo de on mastèlo normale, e pì stréto, cilindrico, dimòdi ke man man ca se ghe xbàsa el livèlo de i crauti dentro, a se pòsa xbasarghe anca el coèrcio pardesora), a se buta sale so ogni strato,( el primo strato l è fato de foje intière), podopo i se pìsta co n tòco de legno - ma pianéto, co delicate'za - finké i mola fora tuta la so acoa, ke la i coverze tuti.
Finio de pìstare i crauti ( pararia ke Axiago i li pistése co i piè), a se ghe mete el so coèrcio ( ke l ga da èsare mobile, ca vòe dire ke lè pardentro de l sercio, ke cusì el se xbàsa man man ca cala el contenuto e l lo tien senpre fracà-zo) e, pardesora, on bel sason pexo.
Dopo on mexeto ke i stà lì fermentare, i kràuti i è pronti : a se tira su el coercio e se se ne tòe la coantità ca te serve, e sa te càti on fià de muféta pardesora no te te preocupi : a te la tiri via e te peski el bòn parsoto.
Nol se dòpara pì el
brènto al dì de oncò : sa te vò prepararte i crauti n caxa, a te li méti fermentare te on secio e dopo verli sala e pistà a te li meti drento te i bo'zoni de vero, senpre coerti da la so acoa, ke cusì l è anca mejo ke no i ciàpa la mufa, e man man ca te cavi a te ghe zonti acoa sala.
Bòni i kràuti.
Però naltri polexan, dire el vero, no faxemo kela version lì
tedesca de i crauti, a ghe ne femo ona on fià manco
stark, dixemo:
col cavolo tajà strikéte e meso zo tel desfrìto de 'zeola col roxmarìn, e dopo se ghe zonta l acoa e paroltemo l axeo. E anca na pontina de concentrato de pomodoro pa darghe el colore, e pevaro bondante ke i ga da vegnere ben saorioxi.