Modi de dire sol magnare

Modi de dire sol magnare

Messaggioda Sixara » sab ago 29, 2015 11:08 am

Modi de dire sol magnare
viewtopic.php?f=31&t=1796


A ghi n è de bèi de modi de dire sol magnare :

El ga magnà puìna : la puìna la sarìa la ' ricotta ', ke lè bòna anca cuea, ma la vien fata col sièro de l late e se pensa(va) ke la ghése poca ' sostan'za ', tanto ca se podarìa dire ke ki ca magna puìna... poco camìna, o anca : poco conbìna, insoma lè ono ke l ga poca for'za ( anca d ànemo).

La ghe và pèzo a cueo ca magna merda e par gninte, de le olte : a se dixe de ono ke l ga fato sacrifici, anca omilianti, par no verghe nisùn rexultà.

Senpre sol ' magnare ' te kel senso lì de soportare dexgra'zie, a se dixe : el ghe n à magnà na stùfa, el ghe n à magnà fin stufarse.

El xe on magna-e-dexmentega a se dixe de ono fa'ziliton, ke l dixe de fare-brigare ma dopo el se dexmentega voentieri.

Magnare anca la dòta de Sant'Ana : no se sà, dire el vero, se la dòta de la Santa la fùse poca o tanta, dognimodo el se dixe de ono ke l se ga magnà tuto el capitale, fin le broze de San Ròco, anca cuée el se ga magnà ( però forse sto m.d.d. cuà oltemo el se ghe dixe de ono ke l magna tuto, propio tuto, ke no ghe fa skio gnente).

A se pòe magnare carne de diversi tipi :
de baùco par exenpio, co te sì drìo tajare o fetàre calcòsa e te xbrìsa el cortèlo so i déi ( elora i pòe mandarte n farmacia conprare on fià de dexbaukina);
de còlo co te xlonghi el còlo pa vardare na bèla toxa ca pàsa ( o altre robe ca no te pòi 'verghele, solo vardare);
de tas : magnare carne de tax(ere).
La carne a se pòe anca darghe(la) e ciapàrse(la) : darghe/ciaparse na bèla le'zion (bòte ma anca solo parole).

E i faxòi?
Andare su e xo come i faxòi n pegnata a se ghe dixe de ono ke l canbia senpre idea, ke lè ora da òvi, ora da làte, de zènte ca fà on mucio de confuxion par gnente;
no tegnere gnanca el brodo de faxòi se dixe de ono ke no lè bòn da star 'zìto, on babaron, ke l và n jro a contare i so intarèsi e cuei de kei altri;
magnare i faxòi asième : scoaxi come ' fumare el calumet de la pace ' pa i indiani, tantè ke a ono ke l se tòe màsa confiden'za a se ghe dixe : Ciò ghemoia magnà i faxòi asième, mi e ti?;
magnarghe i faxòi ( o i bìgoli, o i rìxi, o i bìxi) n testa a calkedùn a vòe dire : darghe le càne a ono ( a scòla, sol laoro, ma anca in alté'za) ;
no me pàsa el faxòlo : a go na fìfa boja tanto ca no ghe pàsa gnan on faxolo .
( i faxòi a i ghemo senpre magnà n Vèneto, dapartùto; i è anca on segno de 'bondan'za come, tanto ke on proverbio el dixe : Co le è bele le patate se marida tante toxate, co i è bei i faxòi se marida tanti fiòi. A ghè anca i faxòi co le tiràke, ca sarìa cuan ke te la minestra de faxòi a ghè tanto de kel formajo ke, co te la tiri-su col sculièro , la fa i fili, le tiràke).

E la fava ?
Magnare fava la ga 2-3 significà ma ve ne digo solo ke ono : se a magnare fava i è le dòne ca xe restà vedoe, a s intende el verbo ' fare ' a l inperfèto... a pararìa ke le vedoe le vive(se) te l eterno ricordo de cueo ca fava el caro estinto.

Magnare polenta co na man sola : sen'za conpanadego, segno de mixeria nera.

Capire bìxi par fave e pan par polenta a vòe dire : fraintendare ( el sarìa el fischi per fiaschi de l IT)

Magnare candele e cagare i stupìni lè come dire magnare i fruti e cagare i pecoi : a la fine te paghi tuto.

Magnare (carne de) òco : se ghe dixe de cuei ke i è incalmà co l òco. A l feminile la ciàpa tuto naltro significà, naturalmente.

Magnare pan e spuàcio : vìvare n mixeria; magnare el pan pentìo : se capìse; èsare come pan e cortèlo : come can e gato, ma pèzo.
Verghe pan in forno : ca ne te manca gnente ma anca ke te ghè on mucio de robe da fare; naltro significà ( Boerio) : ndarghe drìo a le femene ' poco oneste '.

Magnare lengoe de cardelìn o anca de canarìn : èsare delicati porasè tel magnare, on fià skiolìni - schifiltosi;

Magnarla col sculièro : còsa? A se pòe ben imajnarlo ca vòe dire : vìvare te la sporci'zia, n mèzo a l onto;

Magnarse el muxo : gnente de cueo ca se podarìa pensare, ca vòe dire on senplice ' parlarse ' ( da vi'zìn);

No magnare pa no cagare : a se ghe dixe de i avàri-piocioxi, cuei strùki de skei ( e de sentimenti);

Magnarse anca i copi : dilapidare on patrimonio intièro.
Avatar utente
Sixara
 
Messaggi: 1764
Iscritto il: dom nov 24, 2013 11:44 pm

Re: Modi de dire sol magnare : altri modi

Messaggioda Sixara » lun nov 02, 2015 2:41 pm

El se la taca col desfrìto : se ghe dixe de ono/a ke l ga i corni roèsi, la luna storta e 'lora coalsiasi scuxa lè bona pur de brontolare ( specialmente a tòla)

Tacà come le sarèxe : de do persone ca và d acordo fra de lore, mejo se i è propio drìo discorare, tacà propio come le sarèxe, co le teste vi'zine, magari i è drìo vardare la stésa roba

Ciapare le trìpe : come ciapare la carne, ciaparse na ramenà de parole, se no' propio de pàke

Patìo da i brodi : ono magro -magro, scancanìo

Esare in torta o intortarse co coalkedùn/calcòsa : 'verghe parte n calcòsa ( de solito de poco onesto)

Catàre la tetìna bona : catarse on laoro ke no te fè fadiga e magari i è kei altri ke i laora a l posto too, ma ti te ciàpi i skei

Verghene na supa : verghene fin sora i cavei, no poderghene pì de calcòsa

A propoxito de ... sùke! : cuàn ke coalkedùn el scumi'zia el discorso co a proposito de... 'zuke a se ghe dixe... ke lè senpre ora de le 'zuke, le càpita senpre a propoxito :D
Avatar utente
Sixara
 
Messaggi: 1764
Iscritto il: dom nov 24, 2013 11:44 pm

Re: Modi de dire sol magnare: altri modi (vixentini)

Messaggioda Sixara » lun nov 09, 2015 2:49 pm

Altri modi de dire sol magnare : sti cuà i dovaria èsare vixentini o tornovia :D ( o almanco, ke i li ga sunà-su el Gruppo di Ricerca sulla Civiltà rurale de Schio)

Avere el gato sol fogo : sa te ghè el gato sol fogo(laro) a vòe dire ca no te ghè gnente da metarghe desora de le bron'ze e
No ver gnanca la sènare sol fogolare : ca te sì cusì puareto da no verghe gnan la 'zenare

Verghene na sixola : verghe tanta fame e
Ver siorana ke xbixigola pa le coste: verghene ncora de pì ( la siorana ke la sia la siora- àna?)

Essare stravanio da la fame : anca èsare dexlubià da la fame;
Verghe la pansa in fondo i calcagni;
Roxegarse le onje da la fame

A magnaria on bò co i corni e tuto! : sto cuà a lo dixen anca nantri e
A go sen... bìvi el fen! o anca Bevi el cren! Pìsate in sen! e
Go fame! Magna curame! o anca Bàxaghe el culo al polame

Chi che no ga fame ga xa magnà;
Chi trova costion sol magnare no ga fame;
Chi se lagne del magnare ga poca fame;
Chi va in leto sènsa sena tuta note se ramena e

La pegnata de l'artexan, se no la boje onco, la bujirà doman: " l'artigiano era così povero che non tutti i giorni riusciva a mettere in pentola qualcosa, ma fidava nel futuro (Basso Vicentino)."
Avatar utente
Sixara
 
Messaggi: 1764
Iscritto il: dom nov 24, 2013 11:44 pm


Torna a Magnar e bevar veneto

Chi c’è in linea

Visitano il forum: Nessuno e 2 ospiti