El formento

El formento

Messaggioda Sixara » gio giu 11, 2015 10:03 am

El formento
viewtopic.php?f=31&t=1672


El sole xe alto e na spiga tuto el mondo, el dixe el poeta :D

El formento o Il ciclo del grano, in Civiltà contadina polesana, catalogo della mostra allestita a Rovigo, Salone del grano, 21 ottobre-6 novembre 1978, testo di G.Beggio, pp. 58-63. ( mia trad.)

Jugno lè el pì bel mexe de tuto l àno : a ghè gnente da fare, tuti kei altri ghe và pardedrio cofà bele'za de la canpagna... de i colori ke ga l verde ncora tènaro, el biondo de l formento drìo farse... dopo miedù, basta - finìse tuto.
Jugno lè el pì bel mexe pa nàsare : el vèrze l istà ma, come l formento ke lè el primo racolto, el scumi'zia sararla anca, me son-ti spiegà? El vèrze e a isteso tenpo el sàra on ciclo: mi a so nata propio n Jugno, tenpo de mièzare-tenpo de solsti'zio , scuxème sto destìn ca me lìga a sto mexe, cofà on pèrsego a l òso :D

Immagine


I canpi indoe ca s intendeva somenare el formento i vegnea preparà te i primi jorni de otobre, dopo ver cavà le bietole n agosto o makinà el formenton a setenbre ke, de sòito, el formento el ghe ndava drìo a l ciclo bietole-formenton ke lè na pianta ca lo ponsa el teren.
La somena la vegnea fata tornovia el periodo ca và da l 20 de otobre fin là da i Morti : nò prima parké le piantexele le creséva màsa presto e le sarìa ndà incontro a l jà'zo de novenbre, e nò dopo parké no l avarìa podesto cresare bèn, senpre pal steso motivo.

Co la vèrta, là mar'zo-aprile, bixognava ndare tel canpo cavàre le erbà'ze : na opera'zion ke la se faxea a màn co la somena la vegnea fata manualmente e de conseguen'za el formento nol cresea n filari; co se ga scumi'zià doparare la somenatrice, pa cavare le erba'ze a se doparava de i 'zapioi, ke le sarìa de le 'zàpe picinine propio pa kel laoro lì ke lè de preci'xion, e dopo el 1940 de i muxikieri e de i cariòi, prima de la seconda guera.

Dopo ver-lo 'zapà, se l formento el jera magro a se ghe dava da magnare : prima de i àni 30 co l loàme, dopo se ga scumi'zià co i primi còncimi .

Verso la metà de jugno, cuan ke la spiga la jera maùra ma nò gnancora seca, cioè prima ke i gran i croése parké i jera deventà màsa pexanti, a se miezéva.
No ghe jera on momento precixo par mièdare : bixognava tegnerghe de òcio a le spighe: cuan ke le rideva, elora a se scumi'ziava.
Col segheto : a se ciapava na brancà de piante, piegandole on fiatenìn parfòra, e co kelaltra man a te le tajàvi, stando tento però ke, dopo ore e ore sota l sole, el segheto el ghea na certa tenden'za a xbrisarte so le ganbe:
Saldo el segheto te la man secura/ ganàse strete sota l capelon/ col su'or ca te inbronba la camixa/ làvari seki e testa de broon / te tiri vanti curvo so le xgarbe /fate da fresco ke le te ponze i piè... , el dixe L.Rizzi.

Pa mièdare a ghe jera n ordine precixo, na dispoxi'zion de i medaori sol canpo : i se metea a rastèi - ono rente de kelaltro - scuadre de dièxe òmani ke i ndava vanti te la stesa dire'zion, ogni un col so trato, tajando le brancà e muciandole, man-man, pardedrio de lori, sen'za ligarle.

Difati ke la ligaùra i la faxea dopo, soto-sìra, elora a se doparava i bal'zi fati de careto o col scarto de la fibra de l cànio o se propio, i ligava le fàje col formento steso fin ca no rivava l òmo ca portava le ma'zoe de bal'zi.
Bal'zooo ! i ghe oxava e cueo el corea trèso i canpi de stùpie ke le ghe ponzeva i piè, le ghe xgarbelava le ganbe...
Balzo, balzo ! / ziga el re dei meadori/ in ti campi che se miede/ Balzo, balzo! / Questo el zigo de chi crede che la tèra no l'è falsa..., el dixe G.Piva.

Dopo verlo ligà n fàje, a te ghe ne ciapavi cuindaxe e te le incroxetavi, cioè a te le metevi ona so kelaltra incroxà, fin darghe la forma de i covoni - le croxete, a punto.
De le cuindaxe faje, trè le vegnea mése par de sora de la croxeta a farghe da capèo, pa ripararla da la piòva o da l màsa-sole finke no le vegnea cargà co le forke so n caro tirà da i bò o da i cavài, e portà n corte pa trebiarle.

El dì dopo a se ndaxea te i canpi pena miedù pa spigare : sunar-su le spighe ke le ghe jera scapà miedendo. De matìna bonora le partiva, tute dòne e fiòle, e le ndava spigolare tel canpo, ore e ore sota el sole, cucià... pa farse pasare la fadiga le cantava finke l paron o uno de i so òmani el le tegnea de òcio, ke no le se toése le spighe drite drite da le croxete.

La trebiatura e la ventaùra le vegnea fate n corte. Prima ca se vedése le prime trèbie l opera'zion de l trebiare el formento la se faxea co la versèa - on insieme de do bastoni ke ono el vegnea xbatù so le spighe.
Co le prime trèbie (1900) e le makine vapore ca le movea, a jera manco fadìga de batarlo co la versèa e pò ... vòto metare trebiare co la vaporièra ca fa jrare i 'zenjoni... el dovea èsare on spetacolo grando.
Ogni faja la vegnea dexligà e mésa drento n buxo grando so la parte desora de la trèbia, na spece de boca, e difati ca se dixea ke i ghe daxea da magnare a la makina. Makina a se dixea e makinare a voleva dire trebiare.
Da la makina a vegnea fòra :
1. i gran ke i cascava driti te i saki tacà a de i gan'zi vi'zin a le bokete, pardedrio de la makina;
2. la bùea - la pula - dita anca la camìxa del gran ke, asieme a la pajòla - paja de scarto - le vegnea fòra parsoto de la makina e parà-su co i restèi e portà al buleàro co de le barèle dite 'ziliére.
La paja cuea bòna, ke la vegnea fòra pardavanti de la makina, i la portava via co i angùn - do perteghe bastan'za longhete - fina l pajàro.
El buleàro el jera pal scarto de la paja , on mùcio, fato su e su.
Ma el pajaro... o-cari - tuta naltra roba.

Bixognava èsare bòni de far el pajaro , àni e àni d esperien'za : a te xbaliavi calcòsa tel metar zo la paja e a vegnea zo tuto, mandando culo n sù el laoro de na jornata intièra.
La parte pì alta de l pajaro se ghe ndava co na scala fata pòsta : la scala da pajàro o el scalon, a diria mi, ke la jera fata da do trave gròse, longhe 8 metri pì o manco; oltre a i normali piròli a se ghe zontava altre do-trè tòle pa la longa. La jera veramente na roba granda, e pexa, sta scalona ke la dovea tegnere el pexo ( ma anca el largo pa movarse) de cuei ca ndava sù co le 'ziliére carghe de paja. Na spece de inpalcatura, dixen.
N Polexine i faxea de preferen'za i pajari a forma de caxa, co l coèrto co i do spioventi, ma ghe jera anca cuei a forma de còno da le bande de l Alto-Polexine. Te sto caxo cuà i pajaròli i dovea èsare propio bravi fare l so laoro, ke no i doparava i angoun ma solo ke na pèrtega longa. Elora i dovea inpirarla drento el mùcio de paja sol seléxe, portarsela fin so la spàla, e - senpre de fùga - corare co sta pertega fin al pajaro ( ke nol jera propio lì tacà a l selexe, de le olte bixognava farghene de la strada, e mantegnere senpre la justa inclina'zion de la pertega ke si-nò a te perdevi tuta la paja pardedrio) indoe ke l la scargava co n movimento solo.
A gò n dubio ke la pajar-a la fùse cuea col coèrto e l pajar-o cueo a còno... parké, de sòito, el fem. de na parola l indica na dimension pì granda de l mask. de la stésa ( par ex. bùxa-bùxo)... ma l me restarà, ke mi caxamia a lo go visto e sentìo ciamare solo ke pajaro, e nol jera pì fato de paja 'sciolta' dixen, ma co le bàle.

A se rancurava tuto : buleàri e pajari i ghe serviva - te l economia de la corte - pa conservare la paja da farghe l lèto a le bestie n stàla, par tuto l àno.

Dopo verlo trebià el formento el vegnea destirà col rajòeo da formento sol seléxe parké l se sekése a l sole. Dopo on poki de jorni i lo ventava, cioè butà contro vento co de le pale apoxite.
El rajòelo el ghe somejava a on rastèlo ma el ghea na toleta de legno streta a l posto de i denti : el ghea on manego longo asè e l serviva propio pa destirare el formento.
La ventaùra la vegnea fata co sta pala de legno, col fondo nò tanto grando, co de le spondine divergenti e on manego longo.
Dopo verlo ventà i lo mixurava col staro, na spece de recipiente de lata de forma cilindrica. Co trè palon ( na pala col fondo pì grando ma col manego pì curto) de formento a s inpiniva on staro. Co trè stari a s inpiniva on saco da formento.
E dopo ncora i se portava su n granaron.

Immagine
Avatar utente
Sixara
 
Messaggi: 1764
Iscritto il: dom nov 24, 2013 11:44 pm

Torna a Magnar e bevar veneto

Chi c’è in linea

Visitano il forum: Nessuno e 1 ospite