Ganzèga !
viewtopic.php?f=28&t=1699
A la fine de ogni laoro inportante tel mondo agricolo a se faxea na ganzèga : na gran magnà e bevùa e se sonava e se balava tuti asieme sol seléxe pa festejare el bon èxito de la medaùra, de la vendemia , de l far-su i salami ...
Ma la ganzèga-ganzèga la jera cuea pal formento : co se gheva incolmà i pajàri, là fine jugno-scumi'zio lujo... elora se verzéva el tenpo de ganxèga :
BRINDISI ALLA GANZEGA DEI MIETITORI
Se valtri a vardè ben in tuti i buxi,
c'al sia on batexo, na baldoria o i spuxi,
c'al vegna d'giorno o pur c'al sia do note
a gh'ientra senpre Giacomo Mexanote.
Difati a m'dosdrumìsio a la matina
e ai denti a g'dago la so gusadìna,
a Sant'Antoni a ghe digo on'orasion
pregandolo c'al me manda on bon bocon.
A Sant'Agata a g'arcomando la gargata
c'l'abia da funsionare in giornata,
a San Conchèlo chialtre bagatèle :
figà magon vantrìn col so budèle.
E po' el nostro goerno mi ringràsio
che su sta roba l'à tacà on bon dàsio,
sinò magnando e bevendo a sucedrìa
che Giacomo Mexanòte el s-cioparia.
Par questo mi stasìra a gò st'onore
ca m'inpinìse propi tut'al cuore,
do farghe, com ca pòso a sti miedùri
on brindixi co i me pì bei auguri.
On brindixi a vuria c'al fùse gròso
ma ghè xà màsa roba chi intel gòso
c'la ruma, c'la s'armìsia d'sota e sora
on poco la vurìa tornare fòra.
Ma quel ca i ò ficà chi drento al buxo,
pa tornar fora la garìa on bel muxo,
l'è mei c'la s'meta posto pian-pianìn
e mi la iutarò co 'n poc ad vin.
E valtri ca vulì che mi a doscora
vardè do conpatirme e po' in malora
mandème, se do mi an si' contenti,
basta ca no' m'ingurè al mal de denti.
Co sta promésa 'dèso urlen conpàti
on gròso e-viva al paron Mecenati
che senpre generoxo a tut'i l'ore
al s'à mostrà co valtri e de gran cuore.
Che Dio go daga lu la providensa
ma anca valtri pìna la cardensa
do pasta, do polastri e faraona
e tuta cl'altra roba la pì bona.
Ca pudì co amore laorare
pensando po' che caxa a ghì el magnare
par valtri tuti e i vostri ragaso'
eco l'augurio ca vo fàso ancuò.
Ma prima ca finìsa do brindare
on altro e-viva forte én da fare
al nostro lustro e amato Podestà
che co la so prexensa el n'à onorà.
Che Dio l'aiuta in sti muminti strìti,
c'al pòsa far dal ben ai so puvrìti,
c'al pòsa stare in pace giorno e nòte
co questo al finìse Giacmo Mexanòte.
Giacomo Sandali - Mexanote , Papozze (RO) : Brindisi alla ganzega dei mietitori ( del signor Mecenati- alla Lardina - la sera del 16 luglio 1938).
Jacomo Sandali, dito mexanòte el jera ono de kei personaji estroxi ca no mancava mai - come ke l dixe tel so brindixi de i medaori - indoe ca se faxea na ganzèga pa coalke motivo inportante : fine-laori agricoli ma anca rivàre a l coerto de na caxa, spoxali'zi, batezi.. ganzèghe o gaxèghe - xgaxèghe - xganxèghe n Polexine; gaxaìga tel veronexe o xonxega tel vene'zian, bandèga tel ravenàte.
L etimoloja lè poco ciàra ma na roba sicura : ganzèga la se ciama drìo el punto esclamativo ( cofà el titolo de l bel libro de la Chiara Crepaldi da indoe ca suno-su on poke - anca tante - de robe ca catè cuà) ... Ganzèga ! e vai, ke la festa la scumì'zia !