La Madòna de la Navexèla

La Madòna de la Navexèla

Messaggioda Sixara » gio mag 14, 2015 7:13 pm

A Cioxa ( on fià manco Marina ) i è asè divòti a la Madòna de la Navexèla, tantè ca te ghe ne cati on fià dapartuto de imajni soe n jro pa la cità ( pì de doxento i ga da èsare i capitèi votivi sparsi fra le càli e i sotoporteghi : 74 cali a 2-3 icone ogniona), sen'za contare le tolèle votive :

Immagine
Cale scura Airoldi

E sta cuà lè la so storia :

El 24 de junho del 1508 na sionèra granda la bàte Cioxa-Marina ; la Madòna ( pò dita Madona de la Navexela o de Marina) la se fà vedare so la spiaja de Marina so na navexela , na barketa, e la se mostra a Baldissera Zalon o Calom, el guardian de i orti de la fameja Giustinian. El so soranome jera Costa, el Costa, parké el vegnea da Costa on paexe del Polexine forse, ma dognimodo foresto, on imigrà : el s-ciòso.

La Madòna de la Navexèla e el s-ciòso

El vinticuatro de Giugno vien buora, de nord-est come senpre. Ma de pàka la vien su, la spalanca porte e scuri, a supie via copi e camini, co on tronare de tronba da judisio universal; xgravàsi, acua a seci robaltai, lanpinpissa e sajete sol mare in bestia e ki ke promete na Madona de pitura, ki na tolèla a tajare el Sion.
La Madona scolta le preghiere : co on oltimo lanpinpìsa, on buxeneo, on rumegheso lontan el vento ghe mole da supiare, se ferme la piova e vien fuora on sol xbiavo ma el sielo se s-ciarìse.

Baldisèra Xalon, dito el Costa, on s-cioso vanti co i ani, omo senplice e timorato de dio, el va fora de caxa soa e el s invie verso la spiaja par vedare ke dani ke l gavea fato el sion ai orti; e de cuà le erbete rave, le biete zà scuaxi maùre tute sacagnà, de là le carote, i corexini de fenoci, i fenoci maùri co la mandola e ncora el radecio roso, i bixi .. tuto par tèra, come se na man cativa e despetoxa la i gavese cavà via.

El Costa fin kel varda de cuà e de là, el sente na voxe come na canpanina ca lo ciama : " Baldissèra..." e ncora "Baldissera...", e lù el s in fa de maraveja parké de solito i lo ciama el Costa o el foresto, el s-ciòso o Xalon, anca Calom i lo ciama, ca vòle dire ke l è lento, ke l se move co la so camòma; el se volta e .. là de cao , la Madona!
No ghe xe dubio: a xe ela! Tuta vestia de nero, la xe sentà desora de on sòco, propio in riva al mare; la alva el mantelo e so i so xenoci a ghe xe el cristo morto e stramorto, co i oci incagolai e tuto na piaga.

" A cusì l à ridoto i pecai dei cioxòti!" la dixe la Madona e el Costa el se inxenocia e a sconde el muxo infra le man e a pianxe : "Perdonèghe!" el dixe.
" Si mi li perdono - dixe la Madona - ma i avaràve de far penitensa : el Vescoo in procesion fin cuà co tuto el popolo par da drio l'à da vegnire."
El Costa el voria rispondarghe ma el gà on gròpo inte la gola; tuto se fà silensio, el spiona infra i dei de le man e el vede la Madona ke l è dezà montà in barca, na barketa, na navexela, sensa remi, sensa vela, co nisun a bordo, ke la và-via, pianìn e come ke la xe vegnùa, la sparìse .

Immagine
Cale S.Domenico

El Costa ghe parea ca fùse tuto on insogno, ma el sòco l era là, co na gran croxe rossa en cao.
Senpre col dubio, parké el mare el fa de sti skersi, el te fa imajnare de vedare anca cueo ke no xe, el và contarghe sto fato al so paron e asieme i torna a la marina e là, el ghè ncora el sòco co na croxe de sangoe pardesora e, poco pì in là, na barketa xbandonà.
El paron el ghe consilia - Acoa in boca e sito! Ma la note, ke no l é bon de indorme'zarse, eco ca ghe torna la vixion de la Madona co na voxe fiina de canpanina : Baldissera.. Baldissera..
e lù el salta su da inèto, el s inscrimise : - Su mi. su mi, su cuà! - el dixe arfiando.
" Omo de puòco credare!" la ghe rinprovera la Madona e podopo la sparise te on aura de luxe dorà.

La matina dopo de bonora el Costa el va dal Vescoo e anca lù el ghe dixe : Acoa in boca e sito! Ma de note fin ke l se ramena sol leto, ke no xera bon de ciapàre sòno, eco denovo la voxe senpre pì fina :
Baldissera.. Baldissera.. Pecai veci, penitense nove! Va, cori dal Vescoo!.
E Baldissera el core dal Vescoo e staolta sì k el Vescoo el lo scolta : el ciama el Capitolo e anca el Podestà col Consejo Majore e Minore, e tuti i Magistrati e el ghe conta cueo ca xe capità a Marina. Staolta parla el Vescoo : nisun oxa dire ke no xe vero o cojonarlo co 'storie de s-ciòso, no ghe credemo', an'zi a se tole subito na decixion : Penitensa publica ! Tuti in Procesion!

Immagine
Cale Piva

El Veskoo col Capitolo e l Podestà col Consilio Major e, pardedrio i preti e i cotanti vestìi de candido merleto, scorlando dal turibolo nuoli de incenso. E dadrio le fie, vestie co i pani bianki del tondo: oci namorai, boca de suxina a cantar la Santamaria co na voxe sola, vardando in tera ma spionando in su li omeni ke i vien dadrio, co i so vestiti da tera e da festa : mercadanti, calafati, scueraroli, acuaroli, ortolani - co calse e bareta, axure come lilà - marineri, pescaroli - col saloniko e calse gròse de lana selesti fin ai zenoci, ghete, pantofole, scòfi, barete de lana rosse col fioco blù. E subito i parte in Procesiòn : co la Madona en cao e dadrio putini e putine , toxeti e toxete, fantolini, vestii de roxa e de axuro, maseti de fiuri de canpo inte le manine, el Clero co le vesti pì bele co i coleti rossi, l òro de la pianeta, de la dalmatica, del piviale; e i chierici tuti vestii de bianco, co i pi'zi traforà...

E cuan ke l Vescoo co tuto el Capitolo, el Clero, el Podestà col Consejio, i Magistrati e tuto el popolo i riva a la marina a ghè ancora el Sòco Santo co la so croxe rossa e la Navexela Santa. Parké ormai tuti i ghe crede parké i lo vede : a xe on miracolo.
Ma racuanti oncora no i ghe crede e i va verso la navexela e man man ke i ghe va visin, ela la va distante, portà via da la corente, a pararia; elora i se buta a mare par ndarghe visìn ma cuesta la va e la torna, la va e la torna ogni olta ke cualkedun el prova de tocarla.
Uno de cuesti el se ciama Alvixe Frixo ma par sto sgarbo ke l ghea fato a la Madona el vegnarà ciamà , propio da kel istante e par senpre : Sfrixo.
Cusì l è ndà la storia, pare. Se dixe, pararia ke la fùse ndà propio cusì.

E.Sfriso, Uomini di sale. Istorie de mare, de fiumi e de tèra, Nuova ed. Charis, 1985, pp. 88-91.
El titolo orijnario lè : La Madona de la Navezela o Madona de Marina. on fià adatà da mi ke l autore el scrive (ke no lè bòn da scrìvare) te on misto de cioxoto italianizà ke a ve lo sparagno.

Immagine
Cale Donàjo
(eh? si o nò - ke i xe tuti-artisti infra Cioxa-Marina :D )
Avatar utente
Sixara
 
Messaggi: 1764
Iscritto il: dom nov 24, 2013 11:44 pm

Re: La Madòna de Marina

Messaggioda Sixara » lun mag 18, 2015 8:10 pm

Comè ke a Soto-Marina no i lo gà scuaxi par gnente el culto de la Madòna de Marina? :?
E sì ke la xe roba soa, la Madòna de la navexèla...
ke stranbi ke i xe da kele parti là : la 'zuca i la ciama marina ma - de Cioxa, cusì come el radecio e anca le arbéte, kele bèle rave picinìne ke, co te le tàji metà, le gà kei bèi anèli viola tuto tornovia... anca cuele le vien dite cioxote e i è pì conoseste a l estero dir la verità, ke da naltri.
Insoma sta Madòna - jerela conparsa so la spiaja de Marina, sì o nò?
E comè ke la xe finìa a Cioxa?

Immagine
Cèxa de S.Jàcomo-Cioxa

Nantro ke l descrive l evento lé Calcagno A.M ke in Storia dell'Apparizione di Maria Vergine sul lido di Chioggia, Venezia 1823, cusì el conta de la vixion de l Costa :

Mentre che a pianze come on desperao ghe par che qualchedun l'ebia ciamao,
la vose vien de la parte del mare,
a varde ben e a crede de insugnare:
involtolà da on manto tuto nero
gh'é na dona co un'aria de mistero.
La xè sentà so on zòco in riva al mare
e la lo ciame : Vien, t'ò da parlare.


E la ghe dixe de ndare da l Vescoo "e di avvisarlo in suo nome che le bestemmie, gli spergiuri e le profanazioni delle feste degli abitanti di Chioggia avevano irritato di troppo la Giustizia di Dio".
( Me piaxe cuel 'di troppo', nantri dirisimo : anca màsa!)
La Madona la verxe el manteo e la mostra el corpo sangoenante de l fiolo, faxendo capire ke cusì i lo gheva ridoto anca i pecai dei cioxoti ( besteme, sconjuri e sperjuri e la mancansa de rispeto par le feste comandae).
La vixiòn la sparise:

Ghe xera in riva al mare na barcheta
da l'onde sbalotà, sola soleta.
Su quela la Madona xè montà
e via lontan da sola la xe andà.
T'un batar d'ocio tuto xe spario
e 'l vecio reste là pì che stremìo!


A ghe penso a kel vècio, a kel poròmo ke l xe restà là - pì ke stremìo- da la paura, da l pexo, la responsabilità de la so vixion.
E doncue el vegnea da Costa, el Baldisèra dito Zalon:
cofà tanti de l entrotera el Costa el jera ndà a Cioxa par laorare, ciamà da i paroni de le tère; nol vivea a Cioza-marina ( dopo la guera de Cioza i ghea proibio de abitare so l ixola, i podea ndarghe solo ke par laorare so i orti). Elora co riva la sionera lù, come tuti l è a Cioza e el varda verso marina preocupà par li orti.
I lo ciama Zalon - forse da l colore de la pele, ke l fuse malà de malaria?
L è on omo vanti co i ani, no se sà se l ghea na fameja o se l jera vita-sola ( la solitudine l è on elemento inportante, soto-stante a l raconto); el jera dito anca Calòm ca voe dire uno ca fa le robe co la calma, ma anca lento ( forse tel capire le robe).
La Madona la se fa vedare solo ke a lù, nisun altro la vede e pò la ghe torna in sogno do volte ( eco mi diria ke le dovaria esare tre par ndar ben) e lù el ciapa corajo e el và dal Veskoo..
Ke corajo ca ghe voleva! I podea ciaparlo e farghe fare na bruta fine : foresto, veciòto, malà, solo, senpioto.. mancomale k el jera on òmo! se la jera na dona te le so condi'zion..

Inte naltro libro de V. Tosello, La chiesa di S. Giacomo e la devozione alla Madonna della Navicella, La Nuova Scintilla ed. Chioggia, 2003) i dixe ke el Zalon el vegnea da Costa, on paexe tel ferarexe. Elora lè vegnù su pal delta ...
vabè ga poca inportan'za:
elora come va-la vanti la storia?

Immagine
Salus Populi Clodiensis : la salve'za de l popolo cioxoto

El Vescoo Bernardino Venier el ghe dà mente a l Zalon la seconda volta ke l ghe và, anca parké a scumi'ziava a inpinirse de zente el posto a Brondolo indoe ke la madona la jera conparsa.
I primi documenti i dixe ke zà el cuatro de lujio se scumi'zia a tegner conto de le oferte te on rejstro apoxito.
El diexe de lujio i segna ca vien pagà dei skei par conprare ciòdi e scòrsi par ingrandire la cexeta ( per sgrandir la giesa) ke la doveva zà esarghe da prima de la apari'zion de la madona e ke la deventa mèta de pelegrini.
El vinti de lujio el Vescoo Venier el firma on documento indoe ke l ghe dà l ordene de tirar-su na Basilika intel logo de l aparision. Oh-là na Baxilica! Altroke...
E el sòco/tsòco/'zòco? El soko i lo ghea visto tuti, anca el Vescoo co tuta la delegasion, ma la croxe la jera drio scancelarse e anca la navexela i ghea visto ma anca ela l andava e la vegnea e no i jera boni de ciaparla.
El soko e la navexela i è i dò elementi pì evanescenti tel raconto, o mejo la croxe la sparise subito o scuaxi, la navexela anca ma el soko el resta e el vien fato a toketi dai devoti ke i se li porta via caxa soa e nantro toketo ( no so cuanto grando) el s à conservà fin deso, ke lè drento te la cexa de S.Giacomo.

Ke lè na roba straordinaria,la Cèxa de S.Jàcomo o mejo l insieme de le cèxe, ona tacà kelaltra, ona drento kelaltra.

Immagine

Lè interesante notare ke fin da subito l autorità relijoxa e cuea civica i se mete dacordo su còsa e come fare a jestire sto miracolo ke ghe jera capità, e cuei ca pensa ke " l'abbondanza delle offerte (non) è l'aspetto più materiale e venale della storia" i se sbalia de gròso parké invese, el dixe don Tosello, " ... è il segno concreto della sincerità e della forza viva di questa devozione".
Dognimodo, el Podestà el la gà volesta anca lù na ciave de la caséta de le 'mòxine! Ke col Veskoo no se sà mai.

Immagine
ke ghi nà da èsare pì de ono, de Veskoo a Cioxa...
Avatar utente
Sixara
 
Messaggi: 1764
Iscritto il: dom nov 24, 2013 11:44 pm


Torna a Tradision: fole, canti, poexie, teatro, bàli, mascare

Chi c’è in linea

Visitano il forum: Nessuno e 1 ospite

cron