San Biàxio

San Biàxio

Messaggioda Sixara » lun feb 02, 2015 12:17 pm

San Biàxio da le nove sorèle
da le nove, a le òto
da le oto, a le sete
da le sete, a le siè
da le siè, a le zhincoe
da le zhincoe, a le cuatro
da le cuatro, a le trè
da le tre, a le do
da le do, a la una
San Biàxio da le nove sorèle
l'è restà senzha una!


Immagine

San Biàjo l è el santo ca proteje le bestie soradetuto, ma anca i cristiàn : la gola de i cristiàn. E l vièn dito anca ( ma nò da naltri) el santo de i 'namorà, de i moroxi cofà San Valentìn.
Anca le candele gà ke fare co San Biajo e oncò xe el 2 de fevràro: la Candelora de l inverno sémo fòra :D .. pasà anca i jorni de la merla.. a sémo fòra e se San Biajo el dixe và adajo l è solo parké l è veciòto poareto ke l va pianìn, on paséto a la olta.. :D
Ma ndemo co ordine ke prima de San Biaxio a vièn SantAntonio el 17 de zenàro, o mejo :
Santantonio del boxgàto

Immagine

El 17 de Zenàro a xe S.Antonio Abate, anacoreta del deserto, ke da nantri n Polexine el vien dito del porcello parké l iconografia popolare la lo vede senpre n conpagnia de on boxgato.
El dixe P.Rigoni ( Il Gazzettino Rovigo,16 gennaio 2014,p.XXI) : " Due sono i motivi di un tale connubio : in primo luogo la figura di S.Antonio si è sovrapposta a quella di Lug, una divinità celtica sempre accompagnata da un cinghiale, che tiene una fiaccola in mano per illuminare il tragitto delle anime nel viaggio verso l'aldilà. Una seconda spiegazione vuole che i monaci dell'ordine di S.Antonio abbiano iniziato, attorno all'anno mille, a fondare ospedali per la cura dell'herpes zoster, il fuoco di S.Antonio appunto, e che le popolazioni dei villaggi allevassero un maiale a beneficio dei religiosi che così potevano dedicarsi totalmente all'impegno ospedaliero."
( bà.. mi la seconda ipotexi no' la me convinzhe par gnente..)
Secondo Rigoni l atributo del fògo ga fato n modo ke Santantonio el devegnese el santo protetore de finìli e stàle ( contra el pericolo de tacarse fògo) e soradetuto de le bestie drento le stàle : i bò, i mùsi e i cavali da tiro. El 17 zenaro se faxea la benedision del fén : bò e cavài tuti inghirlandà a festa, bei néti lustri i li tacava ai càri da fén e i li portava sol piazhale de la cèxa pa la benedision. Kel dì là le bestie le faxea festa, se ghe dava na razhion speciale de forajo e no' se podeva farle laorar e a la sìra i cristian no' i podea far filò te le stàle, parké se dixea ke kela note lì le bestie le parlése fra de lore e se calkedun el scoltava el cascava n tèra morto séco.

San Biaxio, te la storia, l è stà vescoo de Sebaste n Armenia. Pare ke l fùse on santo-dotore, on gran guaritore, on taumaturgo. Co scumizhia le persecuzhion contra i cristiani, a pare ke l se fùse sconto te na grota e lì el guariva, co n segno de la croxe, tute le creature malatà ke i ghe portava. Podopo i lo ga scoverto, inprixonà, martirizà e copà: i ga tajà el còlo.
Te l iconografia ca lo raprexenta a ghè senpre le insegne episcopali e de le volte anca on pètene da cardatore ma la pì parte a ghè le candele, 2 candele bele longhete incroxà sol pèto. De le volte a ghè de le bestie, de caxa ma anca selvadeghe e lù, el Vescoo, ke l le carezha.
L è la so virtù pì inportante, cuea de l guaritore : na olta i ghea portà on putìn ke l jera drìo stofegarse co na spina de pése intrigà n gola e lù el lo ga benedeto incroxando le candeline e l lo ga salvà. Ncora dèso tel so jorno e te la cèxa de S.Biajo a Lendenara la se mantièn sta uxanzha de la benedizhion contra le malatie de la gola, a la go vista fare mìle volte e l è asè bela.
Ma anca altre cerimonie ( n volta pa l Europa):
cofà la distribuzhion de panìni speciali da magnare kel dì de la so festa ( a Milàn i se tièn na feta de paneton de l dì de Nadale, méso via aposta);
o anca de ligare on cordon de colore roso tornovia el còlo de i malà;
o anca ( e soradetuto) de fare na fièra pa San Biaxio, na fiera de l bestiame cofà Bovolone ke dèso no ghe sarà pì le bestie ma insoma, altre robe ligà a l mondo contadìn.
In Jermania, te i secoli XIV e XV i benedìva i ponàri co l acoa de San Biajo parké no se le magnese le volpi, le galìne e da nantri el dì de San Biajo a se benedìva le stàle e le bestie.
Pal pasà, parvia de la somejanzha de le so arte co i pèteni e fèri ca lo ga martirizà, cardaori e tesidori i lo ga ciapà pa santo protetore de i so mistièri e cusì a Roma, n Francia e Inghiltèra ma nò Verona sibèn kei mestièri lì i fùse tradizhionali.
N Jermania, pa na asonanzha col verbo blasen ca vòe dire supiàre l è deventà el protetor de i sonadori de istrumenti a fià e pal steso motivo el vien invocà contra le tenpeste.

E San Valentìn 'sa ghe entrelo co San Biaxio?
Te na coalke maniera el ghe entra ke sta sorapoxizhion col santo de i moroxi la ghè te le rejon orientali, n Francia ( Savoia) e n Italia. A pararia ke la festa de San Valentìn la vegnese da la Francia e da l Inghiltèra, parké tornovia el 14 de fevràro a scumizhia i acopiamenti de i oxèi. Anca prima, dire la verità ke a li sento mi zà da on toketo i merli a subiolare... elora San Valentìn o San Biaxio? El 3, el 14 o l ondaxe o l cuìndaxe de febràro come da altre parti?
Ma ( a propoxito de San Biajo e de so-sorèle) la domanda la xe : come ga-lo fato perdarle tute? Xele morte tute, le nòve sorèle de Biajo sibèn ke l fùse on santo-dotore? E de ke malatia... o xelo stà cusì bravo da maridarle tute.. :?
A St. Honoré e a La Motte St. Martin n Francia, le toxe tel jorno de San Biaxio le ghe domanda on marìo; a Carpenedolo (Brescia) el primo òmo ca te lo incontri tel so dì, a te lo baxi e danòvo n Francia, el trè de febràro a se faxea de le danzhe rituali de cortejamento. Cofà i merli.

Ma tornemo a SantAntonio, ke l me piaxe màsa kel santo lì col boxgato :

Immagine

àrelo cuà, col so boxgatìn n brazho , tuto-ciapà, ke gnanca el s incorze ke pardedrio a xe drìo bruxarse el finìle

Immagine
Avatar utente
Sixara
 
Messaggi: 1764
Iscritto il: dom nov 24, 2013 11:44 pm

Re: San Biàxio e SantAntonio

Messaggioda Sixara » mar feb 10, 2015 1:49 pm

SantAntonio nol vòe ca scriva n italiàn :D

Immagine

e naltri a lo contentemo : sto cuà sora l è el panèlo centrale del trìtico de le tentazhion de Santantonio de H.Bosch, 1501, n òpara straordinaria de on pitor stra-grando, forse ona de le so òpare pì grande, vixionaria, surreale...
indoe ca se vede propio le Tentazhion ke l Santo l è stà sotoposto

Immagine

cuà se vede na figura de sonadore, tuto vestìo de nero, co la testa de boxgàto e pardesora na zhoéta : tuta la sinboloja cuà la ciàma l erexia , la tentazhion de la raxia cusì come le figure de dòne-strìe ke le pare celebrare na coalke strìgaria... la moreta-lì ke la alzha kela guantièra co desora on rospo ke l tièn solevà on òvo bianco, la pararìa drio officiare na... ( ca no lo scrivo, parké no xe bèn ma el strùpio lì pardedrio lè drio ndare far la comunion).
El santo el sarìa n meditazhion, poareto o el ghe prova n mèzo a tute kele tentazhion e l ghe fà segno co la màn verso kela tore lì tuta-derucà, indoe ca se intravede el Crocifìso, el vero sacrificio, nò cuelo ke i è drio prepararghe a le so spàle.
Sol sfondo a se vede l incendio co i dèmoni ca xola par aria.
E kel òmo lì ca ghe se vede solo ke l capèo nero, el podarìa èsare el diretore de tuta la vixion : el Mago.

Ma no ghe jèra solo ke Bosch ke l ghea le vixion so santantonio : 150 àni dopo, Joos van Craesbeek

Immagine

e naltro - contenporaneo sto cuà : G.Ciapanna

Immagine
canbia l epoca, canbia anca le tentazhion ma el boxgàto el ghè senpre :D
Avatar utente
Sixara
 
Messaggi: 1764
Iscritto il: dom nov 24, 2013 11:44 pm

Re: SantAntonio : on modo-de-dire

Messaggioda Sixara » mar feb 10, 2015 3:10 pm

Anca S.Antonio se ga 'namorà de on porsèo :D
par dire ke tuti i gusti xe gusti o non è bello ciò che è bello... co cueo ca ghe và drio, el dixe L.Nardo tel so Così parlavamo :
" a parziale giustificazione di chi s'innamora di una donna brutta". ( naturale, ke ki ca s inamora de n òmo bruto no ghe femo gnàn caxo).
El Santantonio Abate el vien anca dìto protettore de le dòne fiàpe
ke le sarìa, secondo el Nardi, le dòne " di poco nerbo, poco avvenenti", ma par mi nò, secondo mì i è kele dòne .. vedemo on fià.. kele dòne on fià vanti co l età ma ncora bèle, ca pararìa ke nisùn vòe torsele.. anca on fià skioxìne, on fià xmaluxà.. ke no ghe va mai bèn gnente, insoma.
Elora el demonio el ghe se prexenta soto forma de na dòna, nò, a tentarlo el Santo... ma lù gnente, ke l ghe preferìse on porsèo.

Immagine

Aah, ke rìdare :D

el porsèo ke l và n jro col cortèo piantà te la vita...

Immagine
Avatar utente
Sixara
 
Messaggi: 1764
Iscritto il: dom nov 24, 2013 11:44 pm

Re: San Biàxio e S.Valentìn

Messaggioda Sixara » sab feb 14, 2015 7:20 pm

S.Biaxio e S.Valentìn i se someja te na coalke maniera : i è tuti 2 santi protetori e guaritori de bestie e cristiàn.
Ma S.Valentìn de pì, ke lù el se ga specializà propio tel Mal de San Valentìn.

A Busolengo te la cèxa de S.Maria Majore a ghè do tolèle votive - ex-voto - ke le fà vedare el santo ca guarìse na bestia n stàla, e on putìn da l male de S.Valentìn - l epilessia o mal-cadùto, come ca la ciamemo naltri

Immagine

Immagine

Gran bruto male el mal de San Valentìn, ca sarìa l epilessia 'granda', cuea ca no se podea curare e ke la dava epixodi gravi, convulsivi, co perdita de conosenzha, e par cuelo ke i malà i li metea sota la protezhion de on santo, ke altro no se podea fare.
Invezhe el mal cadùto sarìa l epilessia parziale o 'pìcola', ke sta cuà , pare, ca se podése guarire :
"El mal caduto el dipende da na gran paura, e anca da na gran pasion, e tanti i lo ciapa in corpo de so mare"; poareti sti putìni malà, i dixea ca dipendeva da on spàurazho ca ghea pasà so-màma co la jera drìo spetarli ... o anca na gran pasion, na pena, on dolore grando...
I malà de mal-caduto co i scumizhia stare male, i se sente indòso na gran strakìxia, on malstare de tuto el corpo e de la testa ke l pòe finire anca co le convulsion o estri da mato, come ke i li ciamava. Elora i li tegneva fermi, i ghe butava de l acoa jazhà, i ghe metea n boca na scorzha de limon o na foja de vegna selvadega, da mastegare o anca solo da tegnere infra i denti.
O sinò
"Per vincere il malcaduco, occorre bere un bicchiere di sangue caldo di maiale, la mattina a digiuno : A le becarìe, la matìna bonora a se vede tanti che beve de sangoe de porselo 'pena trato."
( D.G.Bernoni, Credenze popolari veneziane, Venezia, 1968)

O-là, ecolo cuà el porsèo :D ke cuelo el ghe entra senpre.
O anca :
El malà de sta malatia cuà el dovea portare na ciave de S.Valentìn ligà al colo : ... na ciave d' arjento de San Valentìn, che la costa 33 schèi , e bisogna che i sia fati de carità da 33 dòne maridae, on schèo a testa.
(D.Coltro, Dalla magia alla medicina contadina e popolare,1983)

Uno, col xe malà de sta malatìa cuà el pòe verghe anca de le vixion: n blè

Immagine

o n zàlo ( depì n xàlo, dir el vero)

Immagine
( el famoxo canpo de formento co le gròle, uno de i so oltìmi cuadri)

I te dixea ca te jèri mato, ca te jeri endemonià, i te ciapava e i te metea n manicomio de ste robe cuà e solo ke San Valentìn el podea cavartelo kel bruto-male lì, ca pare ke anca lù el ghe n avese soferto come tanti pal pasà.

Immagine
Heiliger Valentin -Coburg

Dèso le ghè le cure, pafortuna, ma tel jorno de l San Valentìn - ke tuti i se vòe bèn - ricordemose anca de kei malà-lì, ke tuti i li scansava, ke tuti i ghe faxea paura... ma tute le fameje le ghi n éa uno, de pì o de manco.
Però i de-pì i jera sota la protezhion de S.Jàcomo. :)

Immagine
Avatar utente
Sixara
 
Messaggi: 1764
Iscritto il: dom nov 24, 2013 11:44 pm


Torna a Tradision: fole, canti, poexie, teatro, bàli, mascare

Chi c’è in linea

Visitano il forum: Nessuno e 2 ospiti

cron