PAX TIBI MARCE : ( V.LUGANI, (a cura di), "Veneto", in Enciclopedia delle Regioni, Milano, s.d.)
Te na nòte de tenpesta de domila àni fà, na barketa la zhercava de metarse a la remòcia so de on ixola de la laguna.
La vegnea da Akileja e l andava a Alesandria d Ejto. I naviganti i ghea catà posto te on caxon de pescaori, so l ixola.
In mèxo a kei naviganti a ghe jèra anca Marco; i so conpagni i lo scoltava volentiera co l contava de on Omo, Fiòlo de Dio, ke l jera vegnù so la Tèra pa salvarla; anca kela sìra là , dopo 'ver magnà, i se jèra sentà tornovia de l fògo pa scoltarlo contare de Jexù e de i miracoli... podopo, straki, ma 'romai al sicuro , i se jèra destirà partèra pa dormire.
Anca Marco el dormiva, el dormiva e l s insognava, de on ànzolo ke cusì el ghe dixea :
" Su queste isolette, o Marco, sulle quali ora ti trovi, sorgerà un giorno una grande città, una città che sarà una delle meraviglie del mondo. In questa città tu troverai il tuo ultimo riposo. Qui avrai pace o Marco, Evangelista mio : Pax tibi Marce...".
Da lì on poki de dì, col tenpo bon, la barketa la gà ciapà el mare denòvo e l è rivà Alesandria. Là, Marco el predicava el Vanjelo finke i pagani no i lo ga brincà e portà n jro pa la cità co na corda ligà al colo. El dì dopo i lo gà serà n galera, e dopo ncora i lo ga ciapà danòvo e portà pa le strade de la cità, e tuti ke i ghe dava adòso e i lo piciàva finke l è morto.
I volea anca bruxarlo ma de sconton i so amighi i gà portà via el corpo.
Venezhia intanto la jera zà nata e i òmeni ke i la ghea fata nàsare - libera e forte - i zhercava on Santo ke l la protejese.
E cusì, tel 829, do marinèri venezhiani, Rustego da Torcelo e Bòn da Malamòco, dopo ver tanto baucà pa l Ejto, i lo cata dalbòn el corpo-santo, a Alesandria, indoe ke i lo ghea sconto i so amighi.
E cusì i lo porta so la nave ke la spèta al porto e i lo sconde sota i saki co la carne de bosgàto, te la cambusa, ke cusì i Musulmani no i ghe ndava nò controlare.
E, a la fine, i riva Venezhia col corpo del Santo e i se mete subito farghe na Baxilica pa conservarlo, propio int el posto indoe ke , secoli e secoli prima, jera rivà na barketa n mèxo a la tenpesta, de nòte e i naviganti i ghea catà ricovaro te on caxon de càna, là in mèxo ste ixolete so la Laguna...
e on Anxolo el ghea dito n sogno : Pax tibi Marce...