E lora a ghe vòe :
on pése carpa da on kilo e ono da mèzo;
2 'zeole on fià groséte;
5 carote;
3 òvi;
4 sculièri de pan-gratà;
1 sculièro de 'zùkaro e naltro pa la salsa;
1 sculierìn de pevaro
de tuti sti ingredienti cuà a se ghe ne dòpara ;
el pése da 1/2 kilo, 1 'zeola, 3 carote, 3 òvi, 4 sculièri de pan-gratà, el sculierìn de pevaro, on sculièro de 'zùcaro e l sale,
pa farghe el pièn a l pése pì grando.
Par cueo ke l se ciàma
gefilte , ca vòe dire
ripieno : n pratica l è on pése col pièn de pése.
A se ciàpa el pése picolo e l se trìda a crùo (spìne e tuto) co la 'zegola e le carote e tuto cueo ca ghe vòe, e s inmìsia par ben.
Podòpo a se ciàpa el pése grando ( pulito e eviscerato) e l se tàja a fete groséte (do déi) e ghe s inpinìse col pièn.
El se mete zo te na tecia bèla larga, co la so 'zeola e le so carote tajà fetine, se coèrze de acoa freda a filo, ghe se zonta el 'zùcaro, el sale-pevaro e fà bojare pa on ora- on ora e mèza a fògo bàso, col coèrcio n xbàcio, pena-pena.
Co l xe còto el se cava da la tecia e l se mete zo te on bel piato da portata on fià fondo : el ga da fredarse col so brodo, na spece de salsa ke la fà la jelatina pardesora.
Però mi me piaxe el Gefilte Fish soto forma de polpete , se sà ...
e lora se fà cusì :
Drento te la tecia a se ghe mete tute le teste, la pèle, le spine e i scòrsi de tuti pési ( de tuti tipi), e se ghe zonta la 'zeola, le carote fetà, on fià de sèano, on litro de acoa. E se fà bojare pa 15 minuti.
Fin ke l boje a se trìda la polpa de l pése asième co 'zegola-carota-sèano; se ghe zonta du òvi, mèza scodelina de acoa, la farina de àzime a òcio ca vegna on bel composto , ne màsa duro ma gnanca màsa molegato. Sale-pevaro cueo ca ghe vòe e podopo se se bagna le man e se fà le polpetine.
Le se mete zo tel so brodo de pése e te làsi ke le boja, incovercià, pa on oreta.
Co le xe còte le se cava da la tecia e, come pal Gefilte Fish, le se porta n tòla te on piàto, da frede, co la so salsa pardesora.
Ma mejo cuée frìte, nò? de polpete de pése e ve metarò anca la riceta de
le polpete de la Luìxa, ke no le sarà propio
kosher ma i è cusì bòne, ma bòne asè