da Sixara » lun gen 19, 2015 5:15 pm
Matrimonio e Patrimonio l è el titolo de on contare - pa skerzho, ma gnanca tanto - de G.Sparapàn sol matri - monio e l patri - monio ... indoe ke ogniun el ghe và n zherca de cuel ca ghe serve :
Na olta la zente la se zhercava, propio come ca fa oncora dèso can e gati.
Da l'odore che on corpo el spandeva in giro, a se capiva se una la ghe stava e se la jera pronta da somenare. E senza tanto insistare a te podevi incrucarla drìo on figaro, o robaltarla so na carezà. Ma dèso, sirà parché a se lavemo màsa o ca se metemo tanti profumi so la pèle, o sirà anca ca lo ghemo perso sto senso vècio del snaxare, o anca che par via de l tenpo i òmani i xe manco caldi e le done on fià pì frede... l'amore el xe deventà on fià tiviòto.
Come che la sia, i raporti fra mas-ci e femene i xe canbià: le done senpre de pì le vole portar le braghe ma i òmeni senpre che i vole cavarghele.
(...) Difati tute le done , o quasi, le te lo mostra tanto intarese par ti e le te fa dìi gran surìxi, a pato, s'intende, o ca te sìi on tipo porasè intaresante, o mejo sa te ga de i bei schei : pì schei te ga e pì te deventi intaresante.
Tanto che, fin che l'òmo, par 'unire l'utero al dilettevole', el pensa al matrimonio, la dona la pensa al patrimonio, dimostrando de èsare pì concreta de i mas-ci.
Difati, pa fare on matrimonio a ghe vuole cusì tanti schei che se na olta a se dixea 'Oggi sposi', onquò a se dirìa 'Oggi spesi'.
Andando vanti de sto pàso, i testimoni de nozhe, pì che 'l prete, i sirà i nodàri : " Mi Bepina a sposo ti, Felicino parché a te ga on apartamento co do camare e na cuxina 4X4" rivando a somejare, sto matrimonio, a na socetà azionaria, ignonde che la to dona la dirige el to patrimonio come che prima la faxea nostra mare.
Ma presto el matrimonio el deventa na cadena cusìta granda, cusì pesanta ca bixogna èsare in do pa portarla, e qualche olta anca in trì. Dognimodo, on merito el lo ga el matrimonio, parché se l'amore è cieco, a ghe pensa el matrimonio a verzarte i òci. Come conseguenza a ghe sirà senpre manco fioli in giro. E cusì a sparìse tuti zìi e cugnà e al mondo a ghe restarà solo che le suòciare. Ma gnente paura! Ca semo zà in tanti so la Tèra.
E cusì, se na olta a se dixea 'Crescete e moltiplicatevi', dèso bixognarà dire 'Cressete e sottraetevi', anca par via de tanti modi pa evitare de gunfiarse la panza. Ma no senpre la va drìta.
" Non si sarebbe dovuto rompere : che tenpo xelo?" -
el me ga domandà Renzo.
"Condizionale passato" - a go risposto mi.
" Nò - el me ga dito - preservativo imperfetto".
On contare pa skerzho, dixevino, ma gnanca tanto se Giàni el lo publica tel '95 e meti anca ke l lo gabia scrito diexàni prima, a fa senpre i àni 80... a scumizhio-metà ani 80 cusì el la pensava sol matri-patri-monio n òmo de cultura medio-alta, n òmo parbèn, on galantòmo. Figuremose i altri.
