M.Candiani poeta milanexe
November 1948
Calava on quart ai vòtt
e in via Savòna,
sconduda in de la nebbia
d'on lunedì mattina,
November el nasseva
strusand i finestroni e i muradej.
Rivaven col pan pòss e la schiscetta
faa-su dent on giornal,
rivaven cont i crepp
ch'el fiaa boffaa in del veder
el scopellava su quij facc tròpp seri.
Gh'aveven el sospett
che nò domà in November,
ma tutt l'ann, la nebbia e la carisna
quattaven giò, là in fond, prima di praa,
la fabrica del veder.
Pociacch, terra battuda
e ciuff de pajocchin...
De chì, quell di castegn...
de là, ligaa al palon,
trè ò quatter biciclett
denanz al bettolin
col sòlit resegusc
mes' ciaa coi mocc per terra.
"...ciao ti... ciao mì, ciao tucc..."
Parlaven de la paga, de balon
e in di pociacch negaven i schedinn
strasciaa dòpo un'oggiada a la Gazzetta.
Vosava la sirenna di vòtt or.
Nasseva on alter dì de tirà-là.
Quell di castegn a ròst
'me on'ombra el pedalava
e on trenò el ziffolava
sul pont de San Cristòfen.
El vent
Stanòtt el vent
el vosa in mezz ai frasch
là in fond
tra i quatter pobbi.
Scolta!
L’è tutta nòtt ch’el vosa
e l’ingarbia i sces.
I foeuj che l’ha streppaa
se ponden e sgalluscen
su l’erba sbaruffada
e on remissell de fen
el gira in tond su l’era.
Sta chì, e scolta el vent!
Stanòtt el voeur parlà
per cuntà-sù la stòria di tò gent
che trebulaven de fadigh trasaa.
Scolta...!
El dis de terra succia,
de giazzad,
el dis de facc crespaa
che cont on gropp in gola
doggiaven i stagion
e strangojaven spess
pan e cortell.
Sentel adess ‘me ‘l vosa...
...l’è rabbios.
L’ha buttaa-giò ona vanga
sòtt el pòrtich,
el sbatt on uss
che scrizza,
el torna a sbatt.
L’è lù ch’el cerca
tra i gelosij de sbiess
e i veder ròtt,
i tò radis
che dent in de la stalla
biassaven el rosari
cont on latin faa in cà,
de bon comand.
Ma gh’è domà ragner in di marnett...!
Scolta,’me ‘l se lamenta
e a pòcch a pòcch
el và...
El moeur pròpi là in fond
tra quatter pobbi.