Na coalke cronikéta so i Dòxi vene'ziani la conta ke ...
Marin Zorzi (de na nobile fameja vene'ziana orijnaria de la Moravia), el vien elèto tel 1311 parké a se dixea ke l fùse on santòmo e Venè'zia a l epoca la ghi n ea de bixogno de santòmeni, ke i la ghea 'pena scomunicà. E insoma i conta ke, i eletori i jera lì ke i ghe provava a votare e da nòvo, ma no i saea par ki, e intanto a faxea on caldo, ma on caldo... e insoma i se ga mési a la fenestra ciapare on fià de aria e i lo ga visto, el Zorzi, ke l ghe daxea de l pan a i prixonièri e i ga decixo de votare par lu.
Ke l ghea zà n otantina de àni e difati ke lè morto l àno dopo e co eo se ga estinto el caxato de i Zorzi.
No xe servio a gnente de eljere el santo-òmo, ke l Papa el ghe la ga lasà la scomunica.
Naltro de otantàni i lo eleje tel 1365 :
Tomàxo Cornèr. De lu a se sà ke l ga dovesto difendarse davanti i Cuaranta-e-Un, parké el se ghea maridà co na dòna ke no la jera nobile, ma lu nol ghea problemi a dire el parké :
la Caterina la jera cusì brava e bona,ke la ghea le man dòro, ke la lo ghea senpre vestìo cofà on principe, sibèn ke le condi'zion economike no i ghe lo permeteva. Ela la sfodrava e desfodrava le vesti de so marìo ca parea senpre ke le fùse nòve.
I Cornèri i jera deventà cusìta tanti ke, tel '500 a Venè'zia, a ghe jera on deto ca faxea :
Justi no ghe ne xe che ono solo
Boni ghe ne xe, ma no' molti
Barbaro ghe ne xe assae
Corneri i xe tuti.
De la fameja de
Tomàxo Mocenigo a se dixea ke i jera siori, ma cusì siori ke
nisùn Mocenigo el jera poareto,( nisùn Balbi sior, nisùn Eri'zo mixericordioxo) .
Tel so testamento spirituale el ghea lasà dito de no' elejere Francesco Foscari, parcarità ke lè ono
che dixe buxie....
E lori còsa gài fato? I ga eleto
Francesco Foscari.
A catemo anca Malipiero, Moro, Marcello, Vendramìn, Barbarigo, Loredan, Grimani e
Pritti, ke sto cuà nol ghe piaxea tanto, se vede :
Questo Doxe chan
Si fusse in vui
El squartaria doman.
Podopo a catemo Donà, Venier, Memmo, Frizzo e
Pexaro.
De l Doxe Pexaro a se sà ke, co i jera drìo la guèra col Papa tel 1643, a Pontelagoscuro, el ghea dà l ordene a i soldà de portar via de tuto, anca de i cuadri de valore ke dopo i ghe li ga catà n caxa-soa, elora i lo ga mandà n tribunale, a procèso par sta roba cuà. Pò anca el se ghea maridà co la so governante e insoma, co i lo ga elèto doxe, el popolo vene'zian el ghe dixea :
Viva el Pesaro dal caro
che l'è stà in prexon pal la(d)ro
E par oltima pazia
L'à spoxà Dona Maria.
Altri Doxi oncora i è Giustinian, Pisani, Foscarini, Renier e l
Manìn Lodovico, elèto - pare -
sotto oscuri presagi ( e vista la situa'zion a jera fà'zie de credarghe) : i vene'ziani co i lo ga savesto i ga dito
(mi-morti ) I ga fato Doxe un furlàn! La Republica xe morta .
El Doxe Manìn
Dal cuor picenìn
L'è streto de man
Xe nato furlàn.
G.Marcato,
Parlarveneto, pp.94-96.